Rama, me tuta dhe atlete në takimin me shefen e ODIHR (FOTO)

Gjatë gjithë fushatës elektorale të parin e qeverisë Edi Rama e kemi parë me veshje sportive, kryesisht me këmishë të bardhë që mban numrin 30, me kapele, me tuta dhe atlete.

Por me sa duhet look-u i ri i tij duhet të jetë pëlqyer shumë, pasi Rama ka vendosur të vishet pikërisht kështu edhe gjatë takimit zyrtar me shefen e Misionit të ODIHR, Adry Glover, mision që do të monitorojë zgjedhjet 30 qershorit në vendin tonë.


Ai është fotografuar teksa ka dalë nga selia e Partisë Socialiste, ndërsa në sy ranë tutat e tij në ngjyrë grid he numri 30 i stampuar në bluzë e këmishë, njësoj siç bën edhe në ditët kur ka takime elektorale.

foto galeri

foto galeri

foto galeri foto galeri

foto galeri

foto galeri

Rama letër të tretë Bashës: Eja në dialog! Shqipërisë i duhen burra, jo kalamaj, qeveria dhe 30 qershori nuk lëvizin

Kryeministri Edi Rama i ka dërguar letrën e tretë publike kryetarit të Partisë Demokratike, Lulzim Basha duke e ftuar sërish që të ulen pak kushte në tryezën e dialogut për të zgjidhur krizën politike që ka mbërthyer vendin prej më shumë se tre muajsh. Kreu i qeverisë fton liderin opozitar që të shkëputet nga mllefi. “I dashur Lulzim, shkëputu nga krahët e mllefit që ta ka çuar për pambuk logjikën, çlirohu nga paniku i humbjes që të rri shkruar mbi ballë, mbaje për vete e për Plakun tënd Digjital frikën nga Reforma në Drejtësi dhe bëj atë që bën çdo udhëheqës në këtë situatë të padëshiruar: Ulu në Tryezën e Dialogut“.

Rama shprehet se vendi ndodhet në një moment që i duhen kundërshtarë politikë që dinë të arsyetojnë. “Mjaft me këtë karshillëk me zarar që po i bëni vendit, shumicës dërrmuese të shqiptarëve dhe miqve e partnerëve të Shqipërisë, në një kohë kur Shqipërisë i duhen kundërshtarë politikë që dinë të arsyetojnë, jo kalamaj në formë burrash që luajnë luftash në dëm të saj – ndjesë edhe kalamajve për ofendimin e paqëllimtë! 

Ju as i keni fituar, as do t’i fitoni dot deri kur të largoheni nga detyra votat e shumicës së shqiptarëve, ashtu sikundër as keni bindur e as bindni dot, asnjë mik e partner ndërkombëtar të Shqipërisë, Ju vazhdoni i bini fyellit po njësoj. Madje jo, i bini fort e më fort! Sidoqoftë, për hir të njerëzve që me plot të drejtë presin nga udhëheqësit e çdo pale Dialog Politik, unë po e konsideroj mesazhin Tuaj një mundësi për të nxitur Dialogun. Aq më mirë që njerëzit mund të na lexojnë të dyve“.

Megjithatë Rama në fund i kujton kundërshtarit të tij politik se edhe nëse nuk do të futen në zgjedhje, procesi do të mbahet në 30 qershor dhe se qeveria nuk ka asnjë shans që të ndryshojë pa zgjedhje. “Duke Ju ftuar përsëri në Tryezën e Dialogut, Ju lutem të mos harroni ndërkohë se po nuk u kthyet në realitet, përtej dëmit që mund t’i bëni vendit dhe atyre pak individëve kokënxehtë, të cilët mbase për të keqen e tyre mund të shkojnë deri në fund pas berihajit ku po i udhëhiqni, Ju s’keni asnjë shans të pengoni 30 qershorin të vijë për ata që duan të votojnë. Asnjë shans të ndryshoni qeverinë pa zgjedhje. Asnjë shans të më ndaloni mua dhe Partinë Socialiste të Shqipërisë të kryejmë misionin historik të transformimit europian të Shqipërisë“.

Bisedimet Serbi-Kosovë-Shqipëri, Vuçiç: Mblidhi mendttë!

Kreu i shtetit serb, Aleksandër Vuçiç, ka treguar mbi bisedat që ka zhvilluar me homologun e tij, presidentin e Republikës së Kosovës, Hashim Thaçin dhe kryeministrin e Shqipërisë, Edi Ramën, gjatë këtyre dy ditëve të vizitës së tij në Tiranë, në kuadër të punimeve të Samitit të Brdo-Brijonit. “Unë iu thashë atyre, mblidhni mend, ju duhet t’i drejtoheni dialogut, sepse ky nuk është një teatër ku ju flisni për ëndrra rreth bashkimit kombëtar”, është shprehur Vuçiç për median serbe, “Novosti”,  lidhur me deklarimet për një unifikim të mundshëm kombëtar.

Përsa i përket këmbënguljes së presidentit Thaçi me kërkesën e vazhdueshme për ndërmjetësim dhe koordinim mes Shteteve të Bashkuara të Amerikës dhe Bashkimit Evropian në arritjen e një marrëveshjeje që do të garantojë rivendosjen e dialogut me Serbinë, Vuçiç  thekson se përgjegjësia për normalizimin e marrëdhënieve bilaterale, u takon vetëm palëve të përfshira në konflikt. “Unë iu thashë, nuk ia vlen, ju mund të telefononi Kolina Grabar Kitaroviqin, Borut Pahorin e Andrej Dudën, dhe amerikanët, por pyetja është që këto janë vetëm raporte ndërmjet serbëve dhe shqiptarëve, dhe ne duhet të zgjidhim këtë”, ka thënë presidenti serb.

Vuçiç u ndodh në Tiranë për të marrë pjesë në Samitin e organizuar nga homologu i tij shqiptar, Ilir Meta. Të pranishëm në takim ishin edhe liderët e rangut presidencial të vendeve të tjera të Ballkanit Perëndimor. Ndërsa, të ftuar nderi ishin presidenti i Polonisë, Andrzej Duda, dhe Përfaqësuesja e Lartë e BE-së për Politikën e Jashtme dhe Sigurinë e Përbashkët, Federica Mogherini.

Samiti përkoi me “Ditën e Evropës”, përcaktuar si e tillë pasi më 9 maj të vitit 1950, ish-ministri i Jashtëm francez, Robert Shuman, bazuar në metodën komunitare të ideatorit Zhan Mone, deklaroi themelimin e një Komuniteti Evropian të Qymyrit dhe të Çelikut, përmes të cilit synohej pajtimi i interesave ekonomike të Francës dhe të Gjermanisë. Përmes një tryeze bisedimi mes krerëve të rajonit, e kërkua të përcillej mesazhi i aspiratës së përbashkët të vendeve të rajonit në procesin e integrimit evropian.

Në mbyllje të Samitit, u bashkëmiratua një dokument me konkluzionet e takimit.

Rama dështon sërish për negociatat, Merkel i jep shtatorin si afat të ri

Kryeministri Edi Rama zhvilloi një takim dypalësh me Kancelaren e Republikës Federale te Gjermanisë Angela Merkel. Cështja e negociatave ishte një nga temat e diskutimit. Por Rama do të kthehet në Tiranë duarbosh.

Qarqet diplomatike nga Berlini rikonfirmojnë për DW se Franca nuk dëshiron ta zërë fare në gojë çështjen e zgjerimit të BE-se në prag të zgjedhjeve për Parlamentin Evropian, që do të mbahen në fund të majit. Merkel megjithatë nuk mund të marrë asnjë vendim pa miratimin e Bundestagut.

Siç mësoi DW nga qarqet politike pranë CDU-së, afati kohor që nga publikimi i raportit të progresit të BE-së, më 29 maj deri në samitin e BE-së në qershor nuk mjafton për të marrë një vendim për çeljen e negociatave. Burime nga CDU/CSU i thanë Dw-së vendimi i tyre do të shtyhet në shtator.

Rama në Malësi të Madhe: Opozita pengon hapjen e negociatave

Kryeministri Edi Rama në takim me qytetarët e Malësisë së Madhe, është shprehur se opozita po mundohet të pengojë çeljen e negociatave për në BE dhe reformën në drejtësi. Ai i ka premtuar qytetarëve të Malësisë së Madhe se do të bëjë për 4 vite atë që nuk është bërë për shumë vjet.

“Më ka ardhur keq, që  sot kam pasur në rrugë dy grupe njerëzish për të krijuar pikërisht ato trazime në anë të rrugës. Më vjen keq për të gjithë ata  njerëz që kanë të drejtën që mos të jenë dakord me ne dhe me qeverinë. Kanë të gjithë të drejtën që mos ta votojnë kurrë Partinë Socialiste, por duhet ta kuptojmë se fajin e kanë prijësit e tyre të dëshpëruar.

Nuk fitojnë dot me PS përballë, e dinë fare mirë se këtu në Malësi të Madhe nuk kishin asnjë shans që të fitonin dhe e dinë nga ana tjetër dhe ne jemi të vendosur ta çojmë deri në fund reformën në drejtësi dhe po punojmë për hapjen e negociatave. Ata po përpiqen të pengojnë këto objektiva kaq të qarta, por as njërin dhe as tjetrin nuk do e pengojnë dot.

Ne do të bëjmë në këto katër vite për Malësinë e Madhe sa nuk është bërë gjitha ato vite në këtë komunitet. Ne do të bëjmë edhe më shumë për njerëzit e kësaj zone, që kursimet dhe djersën e tyre ta investojnë në vendin e tyre. Këta të PD thonë: Për punë votojmë socialistët, për rrëmujë jemi ne. Ja tek e keni.  Vjen këtu dhe nuk shkon atje për të bllokuar rrugën”-tha Rama në Malësinë e Madhe.

Lezhë, Kryemadhi: Ramën e ka kapur ankthi i dosjeve “339” dhe “184”

Kryetarja e LSI-së Monika Kryemadhi, zhvilloi një takim me qytetarët e Lezhës dhe anëtarët e LSI së këtij qyteti.

Sipas saj në dosjet “339” dhe “184” nuk bëhet fjalë thjesht dhe vetëm për shitblerjen e votave, por për diçka edhe më të rëndë, siç është përdorimi i bandave kriminale për të kërcënuar qytetarët dhe për të marrë pushtetin në mënyrë jo legjitime.

“Edi Ramën e ka kapur ankthi i dosjes 339 dhe 184. Çfarë janë këto dosje. Dëgjojmë shumë për shitblerjen e votës, dëgjojmë batuta, dëgjojmë histori. Nuk është thjeshtë çështja e shitblerjes së votës por është më shumë se kaq. Është përdorim i bandave kriminale për ta blerë votën, për ta kërcënuar qytetarin dhe për ta marrë pushtetin në mënyrë jo legjitime. Për të deformuar votën e qytetarëve në mënyrë kriminale. Dhe që të deformosh votën në mënyrë kriminale është krim dhe për këtë dënohesh. Dosja 339 dhe 184 tregojnë hapur sesi banda kriminale, kanë përfshirë segmentet më të larta jo vetëm të Partisë Socialiste por edhe të qeverisjes së Edi Ramës, për shitblerjen e votës nëpërmjet grupeve kriminale. Këto janë të faktuara në dosjen 339 me zë dhe me figurë. Dëgjojmë dhe ish-shërbëtorë të opozitës apo edhe analistë të Edi Ramës që thonë janë të paligjshme,” – tha Kryetarja e LSI.

Kuvend, kryeministri Rama ja bën të qartë opozitës: Ne nuk luajmë bixhoz me mandatin

Gjatë fjalës së tij në seancën e Kuvendit, kryeministri Edi Rama tha se mazhoranca nuk luan bixhoz me mandatet e deputetit siç po luan, sipas tij, opozita.

Rama u shpreh: “Morën të gjitha ministritë që kërkuan, Arsimin, Financat me idenë që PS mund t’i përdorte në fushatë. Morën për herë të parë kryetarin e KQZ dhe e dini shumë mirë sa luftëra janë bërë për KQZ. Për herë të parë u zhvilluan zgjedhje ku nuk pati asnjë ankesë dhe Kolegji Zgjedhor mbeti pa punë. Dihet si shkoi rezultati dhe dihet po ashtu se pas zgjedhjeve pati një periudhë qetësie ku askush nuk e kontestoi rezultatin, pasi të gjithë komisionerët firmosën të gjitha procesverbalet pa asnjë ankesë. Jemi të gjithë dëshmitarët se çfarë opozite kemi pasur, një grup njerëzish pa ide dhe pa program. Na tërhoqën shpesh në batakun e tyre”.

“E keni mirë parasysh se e gjitha degradoi në një situatë të papranueshme mes palësh dhe sot ne jemi në kushtet kur ata janë larguar dhe një pjesë tjetër e opozitës po zgjedhin të zënë vendin e tyre në Parlament. Është e drejta e tyre. Çfarë do ndodhë me ata që janë jashtë? Është një pyetje qe zgjedhësit e tyre duhet t’u bëjnë. Ne po kryejmë detyrën tonë, pasi ky Parlament është vendi ku na ka sjellë shumica dhe mandati ynë nuk është letër bixhozi. Nuk luajmë me mandatin bixhoz, siç luajnë ata dhe pas të cilëve qëndrojnë grupe interesash që janë mundur nga ne për të bëre shtet. Një drejtor i lojërave të fatit i mirënjohur është atje jo si protestues, por edhe si menaxher. Por në fund të ditës është zgjedhja e tyre dhe lëvizja e tyre nuk i bën dot asgjë, zero PS-së dhe qeverisë,” – shtoi Rama.

Tiranë, Basha: Rama sulm me lëndë kimike, i ka shpallur luftë qytetarëve

Kryetari i Partisë Demokratike iu është drejtuar tre herë qytetarëve gjatë protestës së sotme të thirrur nga opozita e bashkuar. Basha akuzoi kryeministrin Edi Rama se ka urdhëruar sulmin me lëndë kimike ndaj fëmijëve, motrave, grave dhe nënave. Ai tha se Rama i ka shpallur luftë qytetarëve.

“Sot Rama ka urdhëruar një akt të pa ndodhur më parë, sulmin me lëndë kimike ndaj fëmijëve, motrave, grave dhe nënave, grave shtatzëna, në të drejtën legjitime në protestën kundër kuvendit të krimit. Sot Rama i ka shpallur luftë qytetarëve të vet. Në emër të PD-së, dhe opozitës dhe shqiptarëve, i them Edi Ramës, se me këtë akte shpallje lufte të qytetarëve koston do ta kesh 100 % ,ti” – deklaroi Basha.

Kreu i PD tha më tej se nuk ka frikësim dhe se beteja e nisur është pa kthim.

“Ne nuk frikësohemi, ne nuk ligështohemi sepse ne luftojmë për një kauzë të drejtë, për një mision të drejtë, për të ardhmen e shqiptarëve, ne luftojmë për lirinë e demokracinë, ne luftojmë për zgjedhje të lira e të ndershme.Beteja që ka nisur është pa kthim dhe historia e gjatë e shkurtër e këtij vendi na rrëfen se si do të përfundojë kjo betejë, me shporrjen e krimit dhe triumfin e demokracisë e gjithë vlerave,” – deklaroi Basha.

Lushnje, “Luli i shkon mbrapa Monikës”, Rama: Mos shkoni mbas të mbyturit

Kryeministri Edi Rama, ka vijuar takimin e radhës ‘bashkia që duam’ në qytetin e Lushnjës, ndërsa ka hedhur akuza edhe në drejtim të opozitës.

Rama kërkoi nga qytetarët që të mos shkojnë sipas tij pas opozitës pasi ata janë të mbyturit që të mbysin.

“Ata qorra që i binin me kokë murit të Kryeministrisë, që nxitur nga qorrat që s’kanë çfarë t’i bëjnë murit të Kryeministrisë, i kanë rënë këmbëve ekonomisë duke e penguar të ecë ashtu siç duhet, por kanë çuar mesazh të keq jashtë vendit. I kanë dhëne mesazhin, mos hajdeni në Shqipëri të investoni sepse këtu njerëzit i bien murit me kokë. Ju i shkoni mbrapa Lulit dhe Luli i shkon mbrapa Monikës. Monika që ngre sytë nga qielli dhe thotë: Mbroji shqiptarët nga blerja e votave. Iu shkohet pas atyre. Sepse dhe Luli thotë po përgatitet arrestimi i filanit: Mos! Dhe kush flet për blerjen e votave? Nëse Zoti do të merrej me zgjedhjet, Monikës do i kishte rënë rrufeja. Larg qoftë. Gjëja parë që do bënte Zoti do mbyllte Monikën në shtëpi. Kush shkon mbas tyre shkon mbas të mbyturit që të mbyt”- tha Rama.

Gjirokastër, mbështetës të PD grumbullohen të presin me protesta Ramën

Një grup protestuesish të partive opozitare janë duke protestuar kundër mbërritjes në Gjirokastër të kryeministrit Rama.

Rama pritet të mbërrijë së shpejti pasi ka kryer më parë një inspektim të aksit Kardhiq-Delvinë.

Protestuesit të udhëhequr nga deputeti i qarkut Tritan Shehu janë vendosur krah aksit nacional në hyrje të Gjirokastrës pranë parkut të Viroit.

Tritan Shehu tha se Rama nuk duhet të shkelë në Gjirokastër ndërsa ka detyruar 8000 banorë të saj të lenë shtëpitë e të emigrojnë vetëm në 2 vitet e fundit. Protesta është vendosur pas një kordoni forcash policore që për momentin po garantojnë qarkullimin normal të mjeteve.

Pritet që Rama të përshkojë së shpejti këtë aks për të nisur fillimisht takimet me studentët nga Universiteti i Gjirokastrës.