Strasburg, zgjedhjet për Parlamentin Evropian, edhe një shqiptar në garë

59

Shqiprim Thaçi, shqiptari me origjinë nga Kosova, është kandidat në zgjedhjet për Parlamentin Evropian. Ai kandidon në Belgjikë, në listën e Partisë së Gjelbër.

Parlamenti Evropian, një prej organeve ligjvënëse të Bashkimit Evropian, ka 751 deputetë, 21 prej të cilëve i përkasin Belgjikës. Zgjedhjet zhvillohen veçmas në secilin vend anëtar të BE për vendet që i përkasin, dhe në garë marrin pjesë forcat politike të atyre vendeve. Procesi i votimit mbahet nga 24 deri më 26 maj.

Partia e Gjelbër, një nga forcat politike të opozitës, ka gjashtë deputetë në Dhomën e Përfaqësuesve, dhoma e ulët e Parlamentit të Belgjikës, ndërkohë që nuk ka asnjë përfaqësues në Senat, dhoma e lartë e Parlamentit të Belgjikës. Sa i përket Parlamentit Evropian, Partia e Gjelbër ka një deputet.

Vitet e fundit, popullariteti i Partisë së Gjelbër është rritur ndjeshëm, nisur nga politikat e saj që mbrojnë zhvillimin e qëndrueshëm dhe nga përfshirja në radhët e saj edhe të përfaqësuesve nga komunitetet e emigrantëve që tashmë janë integruar në Belgjikë.

Kësaj risie i përket edhe Shqiprim Thaçi, që me profesion është muzikant dhe tani Belgjikën e ka bërë shtëpinë e tij. Krahas muzikës, ai aktivizohet shumë sa i përket çeshtjeve të qeverisjes lokale, duke bërë që Partia e Gjelbër ta përfshijë atë në radhët e kandidatëve. Në këtë mënyrë, edhe pse Shqipëria apo Kosova nuk janë anëtarë të BE, shqiptarët mund të kenë një bashkëkombas të tyrin në Parlamentin Evropian.