Ballina Aktualitet Shkodër, shkrihen strukturat drejtuese vendore të Partisë Socialiste

Shkodër, shkrihen strukturat drejtuese vendore të Partisë Socialiste

Partia Socialiste ka mbledhur strukturat drejtuese të degës së saj në Shkodër, ku ka njoftuar nismën për shkrirjen dhe ristrukturimin e plotë të tyre. Njoftimi është dhënë nga deputeti Arben Pëllumbi, i deleguari nga Kryesia e Partisë Socialiste për të koordinuar procesin e rindërtimit të kësaj force politike në Shkodër.

“Me vendim të Kryesisë së Partisë Socialiste është shkrirë struktura drejtuese e Partisë Socialiste në Shkodër, – ka njoftuar deputeti Pëllimbi. – Në Shkodër, meqenëse nuk i kemi këto struktura, sot kemi këtë grup nismëtar koordinatorësh dhe stafet që ata kanë zgjedhur pikërisht për të menaxhuar të gjithë kalendarin e zgjedhjeve në Partinë Socialiste.”

Në fakt, Partia Socialiste, në të gjithë vendin, është përfshirë në procesin e ristrukturimit bazuar në ndarjen e re territoriale. Ky proces shihet si përgatitje për zgjedhjet e përgjithshme të vitit 2021. Por, në Shkodër, ky proces do të jetë i ndryshëm, pasi, praktikisht, strukturat drejtuese nuk ekzistojnë më dhe ato duhen zgjedhur nga e para.