Ballina LAJME Serbi, nuk ka kthim prapa nga pajisja me sistemin rus të mbrojtjes...

Serbi, nuk ka kthim prapa nga pajisja me sistemin rus të mbrojtjes kundërajrore

Serbia nuk do të pezullojë blerjen e sistemit rus Pantsir-S të mbrojtjes kundërajrore, pavarësisht paralajmërimeve për sanksione nga ana e Shteteve të Bashkuara të Amerikës. Sipas mediave ndërkombëtare, Rusia do t’i dërgojë këto sisteme në Serbi në muajt e ardhshëm në përputhje me kontratën e nënshkruar.

Ministri serb i mbrojtjes Aleksandar Vulin ka deklaruar se sistemi rus raketor i mbrojtjes kundërajrore do të ishte garantuesi i paqes afatgjatë në rajon. Qëllimi i instalimit të sistemit raketor është mbrojtja e pikave kritike, siç janë aeroportet, komandat dhe qendrat e kontaktit nga sulmet e mundshme me avionë, helikopterë dhe avionë pa pilot.

Një muaj më parë, i dërguari i posaçëm i Shteteve të Bashkuara për Ballkanin Perëndimor, Matthew Palmer, deklaroi se Beogradi mund të jetë subjekt i sanksioneve nëse blen armë ruse. “Ne shpresojmë se partnerët tanë serbë do të jenë të kujdesshëm për transaksione të këtij lloji,” – ka thënë Palmer.

Një njësi e sistemit raketor rus Pantsir-S të mbrojtjes kundërajrore kushton rreth 15 milionë dollarë dhe bën pjesë në sistemet e mbrojtjes me rrezë të shkurtër veprimi deri në 18 kilometra.