Ballina RAJONI Serbi, ministri Daçiç: Nuk do të vazhdojë dialogu pa heqjen e taksës

Serbi, ministri Daçiç: Nuk do të vazhdojë dialogu pa heqjen e taksës

Në një paraqitje televizive për televizionin shtetëror, ministri i Jashtëm serb, Ivica Daçiç u shpreh se Serbia e konsideron fitore të madhe mbledhjen e fundit të Këshillit të Sigurimit të OKB, ku u diskutua për Kosovën, dhe madje shtoi më tej se Kosova pësoi humbje në këtë mbledhje.

“Për dy vitet e ardhshme, Kosova do të jetë temë diskutimi në OKB. Në mbledhjen e fundit të gjithë ishin njëzëri kundër taksës dhe formimit të Ushtrisë. Për Vlora Çitakun ishte surprizë e madhe kur dëgjuan se përfaqësuesit e SHBA-ve kërkojnë heqjen e menjëhershme të taksës,” – ka thënë Daçiç.

Ai foli edhe për mundësinë e vazhdimit të dialogut, në qoftë se qeveria e Kosovës nuk vendos për heqjen e taksës, për të cilën çështje tha se nuk ka gjasa të ndodhë.

“Presionet do të vazhdojnë, sepse Kosova nuk ka më çfarë të bëjë. Serbia nuk do ta vazhdojë dialogun pa heqjen e taksës, kjo nuk është një kusht, është logjikë,” – shtoi më tej ministri serb.

Rikujtojmë se prej disa kohësh dialogu mes Kosovës dhe Serbisë është një fazë ngecjeje pas taksës së vendosur nga Qeveria e Kosovës për mallrat që vijnë nga Serbia.