Rama flet për vetëvrasjet në spitalet COVID:”Një fenomen që po ndodh në gjithë botën”

37

Kryeministri Rama ka folur gjatë konferencës së tij për shtyp në lidhje me situatën e COVID-19 në vend.

Rama është ndalur gjithashtu tek vetëvrasjet e pacientëve COVID-19 duke argumentuar se këto akte ekstreme nuk kanë të bëjnë me spitalet apo trajtimin e pacientëve, por me virusin dhe rëndesën psikologjike që ai i shkakton qytetarëve.

Ai më tej u shpreh se këto ngjarje nuk po verifikohen vetëm në Shqipëri, por në shumë vende të botës duke marrë si shembull Francën dhe Italinë.

“Numrat po rriten kudo, po vjedh kancelarja gjermane? Po vjedh qeveria franceze? Kryeministri anglez? Është një absurd që nuk vjen nga padituria, po nga qëllimi ogurzi për të mbjellë dëshpërim dhe për të armiqësuar njerëzit me qeverinë. Shumë e dukshme, shumë vulgare, e dënueshme si strategji politike për të marrë një pushtet, që nuk kanë shans ta marrin. Lavdi Zotit, ky virus nuk na gjeti me qeverinë e tyre, se s’kishim asgjë, – u shpreh Rama. – Nuk i gjeti pavijonet pa çarçafe e batanije, nuk i gjeti të sëmurët pa aspirina. Nxjerrin lloj lloj sharlatanësh që flasin për gjëra pa lidhje. Si ngrihet teza këtu se njerëzit vriten për shkak të kushteve në spitale. Ju bini në kurth se nuk merrni përsipër të bëni një kërkim shumë të thjeshtë, për të parë që shifrat botërisht tregojnë atë që është paralajmëruar nga ekspertët botërisht, që një nga pasojat e futjes së këtij virusi në trupin e njeriut, është nxitja për të vrarë veten”.

Rama u shpreh se: “në Itali, 71 persona janë vetëvrarë, në Francë është rritur numri i vetëvrasjeve që lidhen me Covid-in, dhe ka qenë nëpër lajme. 4 persona në Gjermani, në Arabi, Britani, si pasojë e ankthit dhe frikës së infektimit nga Covid. Mjekë e infermierë kanë vrarë veten në spital, në vendin e tyre të punës”.