‘Mos i përdorni’! Sekuestrohen 200 kapsolla dhe 95 fishekzjarrë në Tiranë dhe Vlorë

0
5

Policia e Shtetit  ka sekuestruar në Tiranë dhe Vlorë 200 kapsolla dhe 95 fishekzjarrë. Sipas policisë gjithsej janë kontrolluar 447 subjekte (dyqane të ndryshme, markete apo supermarkete), si dhe tregje të shumicës, ku janë konstatuar mallra fishekzjarrë apo lëndë piroteknike.

Nga Drejtoria Vendore e Policisë Tiranë janë sekuestruar 95 fishekzjarrë dhe 160 kapsolla me fuqi të lartë shpërthyese, ndërsa nga Drejtoria Vendore e Policisë Vlorë janë sekuestruar 40 kapsolla me fuqi të lartë shpërthyese.

Për këto raste materialet në ngarkim të pronarëve të subjekteve i kanë kaluar prokurorive respektive, për veprime të mëtejshme dhe në një rast, pronari i një dyqani është ndëshkuar me masë administrative nga zjarrfikësit.

Policia e Shtetit apelon për të gjithë tregtarët e shumicës dhe pakicës, që të respektojnë  kriteret e përcaktuara për të mos tregtuar dhe përdorur kapsollat dhe fishekzjarrët  pasi do përballen me ligjin.

Policia e Shtetit fton qytetarët që të denoncojnë në numrin 112 dhe Komisariatin Dixhital çdo rast të shitjes dhe përdorimit të fishekzjarrëve, duke u garantuar reagim të shpejtë, të paanshëm dhe anonimat të sigurt.