Ballina Aktualitet LSI, Braimllari: Bashkohuni nesër në protestën qytetare

LSI, Braimllari: Bashkohuni nesër në protestën qytetare

Gjatë një dalje për mediat deputeti i Lëvizjes Socialiste për Integrim, Endrit Braimllari kërkoi nga qytetarët t’i bashkohen protestës së 16 shkurtit.

Braimllari u shpreh se kryeministri Edi Rama po zhvillon një antimiting për të përçarë dhe përplasur qytetarët me njëri-tjetrin.

Deputeti i LSI tha gjithashtu se protesta e ditës së nesërme është edhe një protestë për të mbrojtur administratën publike nga Rama, të cilin e cilësoi kryeministër anti-kombëtar.

“Jam në këtë komunikim me mediat për të ndarë disa mesazhe për protestën e ditës së nesërme. Nesër është dita e protestës së qytetarëve kundër së keqes. Apeli ynë për protestën e ditës së nesërme, është cilido qytetar që kërkon të luftojë të keqen, të vijë të bashkohet me protestën qytetare. E keqja, krimi, korrupsioni, përdhunimi, hajdutëria, varfërua ka vetëm një emër dhe ky është Edi Rama. Frymëzuesi, nxitësi dhe përkrahësi i së keqes në këtë vend. Anti-mitingu i  Vlorës, është rikthimi i praktikës së errët të viteve ’90, ku anti-mitingjet synonin përçarjen dhe përplasjen e shqiptarëve me njëri-tjetrin. Mesazhe pafund presioni , po i dërgohen administratës publike në të gjithë jugun, ku i kërkohet që të marrin pjesë në anti-mitingun e Vlorës. Edi Rama si një monstër politike, po i bën presion të gjithë administratës, vetëm për të mbajtur pushtetin e tij kriminal që buron nga krimi i organizuar , korrupsioni dhe deformimi i votës së qytetarëve,  e cila u vërtetuar publikisht nga përgjimet zyrtare të Prokurorisë nëpërmjet dosjes 339. Protesta e ditës së nesërme në orën 11 në Bulevardin Dëshmorët e Kombit është protestë edhe për të mbrojtur administratën publike nga ky kryeministër anti-kombëtar, që mjetin e vetëm për të mbajtur pushtetin, ka terrorin dhe presionin me bukën e gojës së qytetarëve. Ndaj ftoj të gjithë qytetarët të na bashkohen në protestën e ditës së nesërme me vendosmëri, me qytetari dhe solidaritet kundër një sistemi antivlerash, korruptiv dhe kriminal që Edi Rama ka ndërtuar në vend,” – theksoi Braimllari.