Ballina Aktualitet Durrës, pas vendimit të Gjykatës Administrative, rifillon puna për projektin “Veliera” (VIDEO)

Durrës, pas vendimit të Gjykatës Administrative, rifillon puna për projektin “Veliera” (VIDEO)

Pasi Gjykata Administrative pushoi çështjen, firma kontraktuese ka nisur punën për përfundimin e projektit “Veliera”, në Durrës.

Pak ditë më parë, Gjykata Administrative e Apelit vendosi të hedhë poshtë padinë e ngritur nga shoqëria civile, duke i hapur kështu rrugë përfundimit të projektit. Kompania e kontraktuar për kryerjen e punimeve ka ringritur tashmë kantierin e ndërtimit, ndërkohë që punëtorët kanë nisur përgatitjet për instalimin e tendës, e cila ka formën e velës, që i ka dhënë edhe emrin gjithë projektit.

Zbatimi i projektit “Veliera” nisi në fillim të vitit 2017 dhe fondi i akorduar nga Bashkia e Durrësit dhe buxheti i shtetit ishte rreth 6 milionë dollarë. Por, punimet u bllokuan pas një padie të shoqërisë civile, për shkak të rrënojave arkeologjike që dolën në dritë gjatë gërmimeve. Megjithatë, pas një kalvari të gjatë në dyert e gjykatave, drejtësia vendosi që projekti të vijojë deri në ndërtimin e plotë.

Për këtë arsye, tani, me heqjen e të gjitha pengesave, në sheshin e ndërtimin ka rinisur puna. Projekti “Veliera”, në thelb, parashikon ndërtimin e një sheshi në fund të Bulevardit “Epidamn” dhe mbi shesh do të ngrihet edhe një tendë, me sipërfaqe 2 400 metra katrorë, e cila simbolizon velat e anijeve të dikurshme dhe lidhjen tradicionale të Durrësit me detin.