Ballina Aktualitet Berlin, Samiti i Ballkanit Perëndimor, analisti gjerman: Ishte shuplakë për Mogherinin

Berlin, Samiti i Ballkanit Perëndimor, analisti gjerman: Ishte shuplakë për Mogherinin

Bodo Weber, bashkëpunëtor i lartë i Institutit Transatlantik të Këshillit për Politikën e Demokratizimit, tha për Zërin e Amerikës se shpreson që takimi i Berlinit, i organizuar nga kancelaria Angela Merkel dhe presidenti Emmanuel Macron, shënon përfundimisht “vdekjen e idesë për shkëmbim territoresh” mes Kosovës dhe Serbisë.

Ai tha se takimi dha “rezultatet që ishin realisht të mundshme: fillimin e një nisme të re të vendeve kryesore të Bashkimit Evropian për të marrë udhëheqjen për t’i dhënë fund një periudhe dyvjeçare të së ashtuquajturës ‘faza përfundimtare’ e bisedimeve, që në sajë të kryenegociatores se BE, Federica Mogherini, shkoi në një drejtim krejtësisht të gabuar dhe përfundimisht u bllokua dhe për të shkuar drejt një rivendosjeje të plotë të negociatave.”

Weber tha se “ishte e qartë që rifillimi nuk do të ndodhte në Berlin. Nuk mendoj që do të ndodhë as në Paris në takimin e radhës me 1 korrik. Me gjasë do të ndodhë vetëm pasi trashëgimtari i zonjës Mogherini të marrë detyrën në vjeshtë.”

Vëzhguesit dhe analistët e kanë cilësuar takimin e Berlinit edhe si një goditje ndaj zonjës Mogherini për shkak të qasjes së saj ndaj ideve për korrigjim kufijsh dhe shkëmbim territoresh.

“Përfundimisht ishte një shuplakë. Federica Mogherini përfundoi duke qenë më shumë një spektatore sesa një pjesëmarrëse. Dhe kjo pas dy vjetësh gjatë të cilave ajo ndryshoi rolin e saj si drejtuese e negociatave duke i rrëmbyer ato, duke mbajtur të painformuar kryeqytetet e Bashkimit Evropian dhe në një mënyrë duke e shndërruar veten në një aleate të presidentit (Aleksandër) Vuçiç dhe presidentit (Hashim) Thaçi, në vend që të mbrojë interesat e BE kundrejt rajonit të Ballkanit,” – tha Weber.

Ai shpreson që takimi “shënoi po ashtu vdekjen përfundimtare të idesë për shkëmbim territoresh, ndonëse duket që presidenti Macron ka nevojë edhe për pak kohë për të kuptuar përse kjo ide e rrezikshme duhet dhe duhej të ndalej me çdo çmim,” – tha ai.

(marrë nga Zëri i Amerikës)