Ballina OPINION Albin Kurti, kundër oligarkëve në Shqipëri e gjymtuesve në Kosovë

Albin Kurti, kundër oligarkëve në Shqipëri e gjymtuesve në Kosovë

nga Nikoll Lesi 

Shqipëria ndodhet në krizë të madhe politike dhe në prag të një destabiliteti shkatërrues me 16 shkurt për fajin e kryeministrit Rama dhe oligarkisë e mafias së organizuar, e cila sipas opozitës, po drejton vendin. Ndërsa Kosova po lufton me treshen Thaçi-Vuçiç-Rama, të cilët me sharrë në dorë janë turr për t’i hequr disa pjesë të trupit të Kosovës.

Tamam kur duket sikur nuk ka shpresë në të dyja anët e kufirit, në skenë rishfaqet përsëri një uragan kombëtar në formën e Liderit përbashkues.

Ai është Albin Kurti, Lideri i Vetvendosjes.

Në Kosovë po lufton me “bajlozët e zinjë”, të cilët tash janë duke vizatuar hartën e prerjes së tokave shqiptare, tamam sikur presin një copë mishi kasapët dhe e vënë për ta pjekur në një vakt me raki, por kësaj radhë në një vilë të re në Prishtinë. E bash në atë vilë të sapo inaguruar si banesë, mishi vloi e u poq, duke dërguar sms Vuçiçit se brenda pranverës e ke gati “trupin” e Kosovës.

Ndaj Albin Kurti nuk hesht.

Me pasionin e idealin e tij patriotik ai po lufton andej kufirit që Kosova të mos copëtohet dhe që kryeministri Haradinaj t’i qëndrojë vendimit të tij si qeveri për taksën ndaj Serbisë. Nëse Beogradi njeh Kosovën në këto kushte, taksa hiqet.

Por Albin Kurti është dhe në Tiranë, si një lider mbarëkombëtar. Ai nuk pranon një keqqeverisje nga Tirana zyrtare, pasi oligarkët dhe mafia po shkatërron Shqipërinë. Jo vetëm Shqipëria destabilizohet nga kjo mënyrë qeverisje, thekson Albin Kurti, por edhe Kosova dobësohet e copëtohet.

Albin Kurti punon për një bashkim kombëtar Kosovë-Shqipëri, por jo duke dhënë pjesë trupi nga Kosova. Dhe jo duke lejuar kryeministrin Rama që t’i ofrojë Hashim Thaçit sharrë me të mprehtë për të sharruar trupin e Kombit, të cilin historia e ka ndarë në disa pjesë, padrejtësisht.

Albin Kurti tashmë është kthyer në një Lider Mbarëkombëtar. Dhe natyrisht si i tillë po sulmohet nga qarqet e krimit e politikës në të dyja anët e kufirit.

Por Liderat mbeten të tillë, pse janë lider!